طبعا يجماعه كلنا بنخاف من الانترفيو وبنعملو حساب..عموما لازم كلنا نتأكد ان انترفيو بنك مصر والقاهره سهل جدا وبسيط ومش بيطلع برا شوية حاجات..ولازم الشخص يتسأل ف حجات ثابته وهى:
اولا:مستوى الانجليزى عنده وده بييجى ف شكل سؤال عرف نفسك باللغه الانجليزيه ومتهيألى كلنا ممكن نرد عليه كويس ومن الافضل تكون محضر اجابتك من قبل متدخل.وكمان مستواك ف الكمبيوتر وايه اللى بتفهم فيه من برامج الكمبيوتر المختلفه.
ثانيا:اسئله عامه ف المحاسبه سواء الماليه او محاسبة البنوك وخلى بالكوا مالهمش تالت...هما دول بس المحاسبتين اللى بيسئلوا فييهم ف بنك القاهره ومصر وانا مرفق فايل فيه كل اسئلة المحاسبه اللى ممكن تجيلكوا ان شاء الله
ثالثا:معلومات عامه وطبعا قبل منروح الانترفيو بيومين ممكن نعد نتفرج على الجزيره او العربيه ونشوف الاخبار بصفه عامه والاحداث المميزه بشكل خاص ومتهيألى برده دى بسيطه وكمان نعرف شوية معلومات عامه عن(البحار زى مثلا البحر الميت وقزوين والاسود بيقعوا جمب دول ايه)+(دول الاتحاد الاوروبى كام دوله وايه هما وعملتهم ايه)+(رئيس دوله معين وانا رافقلكم ملف بخصوص الموضوع ده برده)+(وزير من وزراء مصر وكمان رافقكلم ملف بيه)+(عملة دوله معينه ورافقلكم ملف بيه بردو)
رابعاوأخيرا:اسئلة ال اتش أر H.R. واللى بتتلخص ف كام سؤال:1-اذكر ميزيتين وعيبين فيك..او اتنين ايجابيات واتنين سلبيات وطبعا ممكن السؤال يتوجهلك بالانجلش2-ايه اكتر قرار خدته صح ف حياتك...او بمعنى تانى اكتر قرار مندمتش عليه..او شايفه انه مصيرى ومؤثر وهكذا...3-انتا عاوز تشتغل ف بنك القاهره او بنك مصر ليه وايه اللى خلاك بصفه عامه تفكر ف الشغل ف البنوك؟؟ وهكذا يجماعه...4-ايه اخر انجاز حققته وايه الحاجه اللى كان نفسك تتحقق ولسا متحققتش.
طبعا يجماعه بالاضافه لكل ده فى تقييم ودرجه كبيره للمظهريعنى طبعا بالنسبه للشباب لازم البدله تكون مكويه صح الكرافات والقميص لايىء عليها ..تسريحة شعرك..كمان فى حاجه مهمه اوى:لازم تتكلم بكل ثقه وثبات...حتى لو كانت اجابتك غلط المهم اللى بيعملك انترفيو يشوفك ثابت وواثق من اجابتك لان ده اللى يهمه..انتا مش هتشتغل بشوية المحاسبه البدائيه اللى هيسئلك فيها ولا حتى بالمعلومات العامه ولا بالانجليزى لكن هتشتغل بلباقتك وثقتك ف نفسك...خليك فاكر دى كويس اوى!!!!وتحضر اجابات الاسئله الثابته قبل متدخل زى تعريفك بنفسك بالانجلش مثلا.
***نسيت اقولكوا فى احتمال تانى انك قبل متدخل يديك ابليكيشن تملا فيه شوية بيانات وده بيكون فيه الاسم والسن واكتر ماده جبت فيها تقدير ودى طبعا مش مكتوبالك اى كلام..دى مكتوبه علشان هتتسأل فيها شور..يعنى مثلا كتبت اقتصاد او محاسبه هتتسأل فيها وطبعا كلو يبعد عن المواد اللى مش قوى فيها..كمان بتملا هوايتك....كتبت مثلا القراءه هيقولك اخر كتابقريته ولمين وبيتكلم عن ايه؟؟؟وهكذا...خبراتك واشتغلت ايه وفين وبكام؟؟وبالتالى هيسالك ف كل اللى انت كاتبه!!!
شكر خاص للصديق احمد ناجى
ليست هناك تعليقات:
إرسال تعليق